Les Mocedaes Socialistes de Xixón defenden un Estáu republicanu y federal

Consideren "ineficaz" l'actual sistema políticu y reclamen "más democracia".

"L'Estáu español sufre una crisis económica, política y social ensin precedentes que superó por completu l'actual sistema políticu faciéndolo ineficaz pa facer frente a esta grave crisis y ensin ser capaz de satisfaer les demandes de participación que reclamen más Democracia". Mocedaes Socialistes de Xixón considera que ye'l momentu oportunu pa "empecipiar un procesu d'alderique y reflexón conxunta de toles fuerces polítiques y actores sociales del nuesu país, coles mires de consensuar un modelu qu'apueste pola economía basada nel interés común, los valores sociales y nel fortalecimientu y profundización de la Democracia, ente otres cuestiones".

Pa la consecución de lo enantes plantegao, Mocedaes Socialistes de Xixón considera que la base de l'articulación del Estáu español tien que ser la República y el Federalismu. "Consideramos qu'anguaño la Monarquía ye una institución obsoleta y anacrónica que frena l'oxetivu de la Democracia plena. Los ciudadanos, al traviés de la participación político y democrático tienen de ser los únicos lexítimos pa escoyer a tolos representantes del pueblu español, incluyendo de xacíu, al Xefe del Estáu. Por ello, apostamos por una República".

Al mesmu tiempu reclamamen un Estáu Federal que garantice la reconocencia de la diversidá plurinacional, la solidaridá interterritorial y l'igualdá de derechos de tolos ciudadanos. "Esperamos que mientres el diálogu monográficu sobre democracia que'l PSOE va celebrar el 18 de mayu n'Asturies, surda esti alderique, que resulta yá nestos momentos insoslayable". Les Mocedaes Socialistes de Xixón aseguren que van defender que se camine hacia una República, y "aprovechamos pa recordar que tamos ante una reivindicación que foi consagrada históricamente nos estatutos de la nuesa organización, congresu tres congresu".