El CMX llama a la desobediencia ciudadana ante al "fraude" de tramitación de la ordenanza de convivencia

Llamenten que "los conteníos finales de la ordenanza nun son los aldericaos nes comisiones d'espertos y movimientos ciudadanos que se desenvolvieron mientres el pasáu añu".

El Conseyu de Mocedá de Xixón (CMX) denunció güei el procesu de tramitación de laOrdenanza de Convivencia Ciudadana, que consideren "un fraude a la participación de los movimientos ciudadanos y del conxuntu de les y el xixoneses". Ye la valoración que fizo güei'l so presidente, Javier Suárez, que refuga la decisión del equipu de gobiernu de llevar a aprobación al próximu plenu'l testu definitivu, al considerar que "los conteníos finales de la ordenanza nun son los aldericaos nes comisiones d'espertos y movimientos ciudadanos que se desenvolvieron mientres el pasáu añu".

Otra manera, dende'l Conseyu denuncien qu'introduz  nueves regulaciones qu'habíen quedáu tornaes mientres los alderiques del equipu de gobiernu y los grupos municipales con asociaciones y colectivos. Suárez señala tamién que l'equipu de gobiernu nun informó siquier sobre l'aceptación o non de les 94 allegamientos de ciudadanos y colectivos que se presentaron al testu d'ordenanza mientres el períodu d'información pública. Catorce d'esos allegamientos fueron presentaes pol CMX, "y nin siquier sabemos si fueron recibíes pol conceyal de vez, Rafael Felgueroso. Esto llévanos a denunciar lo que yá nel so momentu apuntamos: que'l procesu de tramitación de la ordenanza nun yera más qu'un paripé pa faer desfilar pol Conceyu a los movimientos ciudadanos, ensin importar lo qu'opinaren. El testu yá taba apautáu ente l'equipu de gobiernu y los sos socios del Partíu Popular", señala'l presidente del CMX.

Ante lo que consideren "una estafa más del equipu de gobiernu empobináu por Carmen Moriyón", dende'l Conseyu llamen a la "desobediencia y la rebeldía ciudadana": "non puede regulase l'usu del espaciu públicu, que privaticen apurriendo a los hosteleros, de llombu a les y los ciudadanos, escorriendo amás a los sectores más desfavorecidos, a los que tendríen de protexer con polítiques sociales, nun criminalizar", argumenten.