El Conseyu de la Mocedá d'Uviéu ufierta un cursu d'asturianu

El Conseyu de la Mocedá d'Uviéu (CMU) ufierta un cursu d'asturianu pa «introducir a mozos y moces nel conocimientu del idioma, y pa dar a les entidaes y a la mocedá ferramientes y recursos pa que motu proprio puedan afondar nel conocimientu del asturianu». Les clases principien el 18 de payares y acaben el 23 d'avientu. El cursu ye de venti hores que se van impartir a los llunes y a los miércoles n'horariu de 18 a 20 hores na sé del Conseyu de la Mocedá d'Asturies, na Plaza'l Sol d'Uviéu.

Los conteníos que se van dar divídense ente los estríctamente llingüísticos y los sociollingüísticos. Nesti últimu apartáu va falase de billingüismu, diglosia y conflictu llingüísticu; movimientu de reivindicación llingüística; prexuicios llingüísticos; normalización y la normativización; la norma nes variedaes; dominiu llingüísticu; dialectoloxía; l'asturianu na rede; y llexislación. Na parte llingüística, nel cursu van tratase cuestiones de soníos y alfabetu, el vocalismu, el xéneru y el númberu, los apóstrofos y les contracciones, l'acentuación, los sustantivos, los axetivos, los demostrativos y los posesivos.

Nel cursu hai places pa 25 persones y, anque ta abiertu a tol mundu, va dase preferencia a la xente que venga d'asociaciones de mocedá y puestos públicos o profesiones que trabayen con un públicu mozo.

La inscripción ha facese nel CMU, na Plaza del Llagu Enol d'Uviéu hasta'l llunes 16 de payares. Tamién se pue facer per corréu electrónicu na dirección coordinadora@cmu.as o al traviés de www.cmu.as.

L'actividá ye de baldre y va dase un certificáu d'asistencia. Pa sacar alantre la iniciativa collaboren col CMU la Xunta Moza, el Conseyu de la Mocedá d'Asturies, el Conceyu d'Uviéu, Cajastur y l'Institutu Asturianu de la Mocedá.