Una plataforma universitaria acusa a la executiva del Conseyu d'Estudiantes de "espilfarrar en lluxos" el so presupuestu

Una plataforma universitaria, acabante de crease baxo'l nome Rede pola Tresparencia Universitaria, va acusar güei públicamente a la direición del Conseyu d'Estudiantes, y mui concretamente al so presidente, Gonzalo Asenjo, de "espilfarrar" el presupuestu d'esti órganu (36.000 euros añales) en "lluxos", refiriéndose, ente otros aspeutos, a estancies n'hoteles d'altu coste o alquiler de vehículos de gama alta.

  Fontes de dicha plataforma informaron a Europa Press de qu'esta mañana, a les 12.30, na Facultá de Melecina, van ofrecer una rueda prensa pa facer pública dicha denucnia, mostrando les correspondientes factures. Tamién van presentar una recopilación de firmes de mediu centenar de representantes estudiantiles nos diferentes órganos (asamblees, xuntes de facultá, claustros y conseyos de departamentu), nes qu'exixen al Vicerrectoráu d'Estudiantes que faiga públiques les cuentes del Conseyu dende'l 2006, pues afirmen sólo conocer les del últimu añu.

  La Rede acusa a Gonzalo Asenjo, y otros miembros de la so executiva, de realizar viaxes p'acudir a les asamblees del CREU, órganu qu'aconceya a representantes de conseyos d'estudiantes d'universidaes de tol Estáu, siendo les estancies n'hoteles qu'en nengún casu baxaron de cuatro estrelles, algamando precios de 150 euros por habitación.

  Tamién se refieren a otros tipos de desembolsos que tachen d'innecesarios, como l'aquiler de vehículos. En primer llugar señalen al gastu de 700 euros nun monovolume pa que cuatro persones asistieren a ún d'estos conceyos a Murcia. N'otru casu, apunten directamente al vicepresidente del Conseyu, Ignacio Chacón, que foi hasta'l Palacio de la Granda, p'asistir a ún de los sos cursos de branu, nun "coche de gama alta" alquiláu, siendo'l preciu de 180 euros. Según la Rede, la propia intervención universitaria pidió esplicaciones por esti asuntu.

  Los denunciantes aseguren que'l Conseyu cuenta con 36.000 euros añales y que se "gasten toos", cuando ésti órganu "nun fizo nada nos últimos dos años".